الكريب الحلو

من طرف نهى سعيد 2009-06-29, 6:52 pm

مقاديره بسيطة اوي
.

كوب لبن
كوب دقيق مليااان
رشة ملح
ملعقة صغيرة سكر
بيضه كبيرة
فانيليا
.

و نحطهم كلهم في الخلاط و نضرب
علشان مايبقاش فيه كلاكيع
.

(بالنسبة للحادق بنحط ملح و فلفل بدل الفانيليا و طبعا بنشيل السكر)
.

لو عايزة قرص الكريب يكون بالشيكولاته
يبقي ننقص من كوب الدقيق مقدار ملعقتين كبار و نستبدلهم بملعقتين كاكاو خام
.

.

و المقادير ديه تعمل تقريبا من 6 ل7 اقراص بحجم وسط
.

بس انا في الكريب الحلو بحب اعمل اقراص صغيرة
شكلها بيكون اشيك
فكده هيطلع عدد اكتر
.
.
طبعا بنستخدم طاسة تيفال او اي طاسة مايلزقش فيها الاكل
.

و بعدين ندهنها زيت او سمن
(علي حسب الرغبة)
.

و نحط بالكبشة في نصف الطاسة

و نوزع في باقي اطراف الطاسة بأننا نميل الطاسة في الاتجاهات الفاضية علشان تتملي
.

لما بنحط الكبشة بالخليط نراعي ان النار تكون هادية علشان نلحق نوزع الخليط في انحاء الطاسة بالتساوي
و بعدين نعلي
و نتابع
لما بيدأ القرص في الاحمرار من تحت
(طبعا هنعرف انه احمر بأننا نستخدم ملعقة او سكين و نرفع بيها طرف القرص شوي )
هو مش لازم يكون محمر اوي
يفضل يكون لونه بصلي كده

.

.

و لما يحمر من تحت نقلبه
بحيث الناحية المحمرة تكون من فوق
.

و نعمل نفس الفكرة
و لما يتلون من تحت
كده يكون خلاص استوي من الجانبين
نحطه في طبق مسطح
بس مانحطهمش فوق بعض و هو سخن علشان مايلزقش
.

.

و هكذا لحد ما تخلص كمية الخليط بتاعتنا
.

الحشو بأه ممكن احنا نبتكره
و ممكن نحشي فاواكه و عليها كريم شانتيه او كريم باتسري
.
.
هقول علي كام حشوة كده عجبتني
.

احلي حشوة عجبتني
.

حشوة البلح بالقرفة
.

نحط ملعقة كبيرة زبدة و لما تسخن نحط عليها تقريبا كوب بلح اسود مقشر و منزوع منه النوي
و عليهم 2 ل3 ملاعق سكر
(حسب الرغبة)
و نصف ملعقة صغيرة قرفة
و 3 ل4 ملاعق مكسرات مجروشة
(اختياري)
.

و نقلب مع بعض كويس
لحد ما يتكون لهم صوص
.

و يستخدم في الحشو
.

ممكن نحشي بالتفاح و الكمثري كمان

.

نفس طريقة البلح بس التفاح يكون اخضر اوي
علشان لما بيطري بيكون طعمه وحش
و القرفة برضه معاه بتدي طعم جميل
بس نراعي اننا نزود السكر علشان هنا التفاح اخضر مش مسكر زي البلح
.

.

ممكن الخوخ المعلب

.

بنفس الطريقة برضه
بس هنا يستحسن من غير قرفة
ولا سكر خاااالص لانه اساسا مسكر
.

و نستخدم الشربات اللي معاه في العلبة كصوص
نحطه علي النار و نستني لما يغلي
و نكون مجهزين ملعقة كبيرة دقيق و نذوبها في شوية ماية
و لما الشربات يغلي ننزل عليه بخليط الدقيق و نقلب لحد قوامه ما يوصل للقوام المطلوب
.

طبعا ملعقة الدقيق ديه قصاد كوب شربات
.

و نراعي اننا لوزودنا كمية الشربات نزود كمية الدقيق
.

نفس طريقة الخوخ ديه نعملها مع اي فاكهه معلبة تانية
زي الاناناس مثلا
.

ممكن نجيب برطمان شيكولاته من السوبر ماركت
و نحشي بيه الكريب
و نرش فوقها بندق مجروش
(طبعا انسب مكسرات للشوكولاته هي البندق)
.

.

.

طبعا الكريب ممكن يتاكل كده وخلاص
.

ممكن بأه نعمله انواع صوص جميله
.

مثلا الصوص الابيض
"صوص الكريم تشيز"
.

ربع كيلو كريم تشيز
(بتكون في علبة زي ديه)

(بس ديه علبة قشطة احنا عايزين كريم تشيز)
نصف كوب كبير لبن
نصف كوب كبير سكر بودرة
ملعقتين كبار زبدة
فانيليا
.

و نحطهم كلهم في الخلاط
وبكده يكون جاهز
.

.

"صوص الكراميل"
بالبندق
.

كوب كبير و نصف سكر
نصف كوب كبير كريمة لباني
(فريش كريم بتاع جهينة)
نصف كوب كبير بندق مجروش
.

.

نحط السكر في طاسة علي النار لحد ما يسيح و نقلب لحد ما يوصل للبني الغامق
و بعدين ننزل عليه بالفريش كريم
و نقلب دقيقة و نحط البندق
و نقلب علي النار لحد التجانس التام و يكون قوامه زي الصوص
من 4 ل5 دقائق تقريبا
.
.

"صوص الشوكولاتة"
.
نصف كيلو لبن
ملعقة كبيرة مليااانه كاكاو
نصف كوب كبير سكر
(100 جم)
ملعقة كبيييرة زبدة لينة
150 جرام شيكولاتة دارك قطع
.
.
نحط اللبن و عليه السكر علي النار
و لما يغلي اللبن
نهدي النار شوي
و نحط قطع الشيكولاته الدارك و الكاكاو
و نفضل نقلب لحد ما الشيكولاته تسيح خااالص
و بعدين في الاخر نحط ملعقة الزبدة الكبيرة علشان التلميع
.
.
ممكن نعمل بعصير الفاكهة صوص
اي فاكهة
كوب من عصير الفاكة ديه
و عليها سكر علي حسب الذوق
و نحطه علي النار و لما يغلي العصير ننزل عليه بخليط الدقيق اللي قلنا عليه قبل كده
.
[b]

من طرف خالد نصر 2009-06-30, 11:42 am

شكرا يا نهى بس الكريب احسن بالحوادق
يعنى الله عليه لما تعرفى تعملى الكريب برجل الديناصور
او الكريب بمنقار النسر
ولذيذ جدا لما بيكون بورك النحل
وجمبو عصير دم الرهوان
مع توابل الغاروران بالسمسم البنداويلى
المقادير
بنجيب 3 كيلو ورك النحل متلج من السودان
6 كيلو توابل الغاروران محوج من الصومال
وبنجيب 3 جوال سمسم بنداويلى بلدى ( من عند عمى جمعه اللى ورا البنزينه ) من جنوب افريقيا
واحنا راجعين بنجيب الرهوان واول لما نوصل ندبحو على طول علشان يكون طازج

بناكل من هنا وربنا ما يوريكى
خير اللهم اجعلو خير بتشوف ناس كتير لابسه ابيض فى ابيض والناس دى جعانه قوى ومشرف الموجه دى هتلاقيه جاى من بعيد خير ان شاء الله يشاور بأيدو اليمين تلاقى اطباق جمبرى وسنابل الصندوق وطراريع البراريز وصوانى ورق التوت بجناح الناموس المحمص وموزه
بلدى
وبأديها الشمال سيول وفيضانات من عصير ودن النمل المحلى

ونتقابل فى الجنه ان شاء الله

من طرف bosekat_010 2009-06-30, 12:53 pm

هههههههههههههههههههههههههههههههههههههههههههههههه لية بس كدة هتكرهنا فية لية

الكريب الحلو

الكريب الحلو

رد: الكريب الحلو

رد: الكريب الحلو